O‘zbekiston Respublikasi Transport vaziri o‘rinbosari Sirdaryoda

Oʻzbekiston Respublikasi Transport vazirining o‘rinbosari Abdugafarov Ilxomjon Abduxalilovich Sirdaryo viloyatiga tashrif buyurib, viloyatdagi mahalliy yuk va yo‘lovchi tashuvchi korxonalar rahbar hamda mas’ullari bilan uchrashdi.
Uchrashuv davomida hozirgi vaqtga qadar sohada amalga oshirilgan ishlar, mahalliy tashuvchi korxonalar tomonidan 2025-yil uchun ishlab chiqilgan chora-tadbirlar rejasi hamda kuzatilayotgan muammo va kamchiliklar bo‘yicha davra suhbati tashkil etildi.
Suhbat davomida vazir o‘rinbosari tomonidan yo‘lovchi tashuvchi korxonalarga aholi va tashrif buyuruvchi mehmonlarga sifatli jamoat transporti xizmatlari ko‘rsatish, aholini jamoat transporti bilan qamrab olish darajasini oshirish, harakat tarkibi parkini bosqichma-bosqich yangilab borish maqsadida rivojlangan xorijiy davlatlar (Rossiya Federatsiyasi, Xitoy Xalq Respublikasi va boshqalar)da ishlab chiqarilayotgan zamonaviy turdagi avtobus va mikroavtobuslar xarid qilish lozimligi alohida ta’kidlab o‘tildi.
Bundan tashqari mahalliy tadbirkorlar tomonidan berilgan savollarga aniq va tushunarli javoblar berilib, sohani yanada rivojlantirish bo‘yicha berilgan taklif va qo‘shimchalar ham muhokama qilindi.