“Til- millatning ma’naviyat ko`zgusi”

Ona tili – millatning ruhi, uning or-nomusi, ma’naviy qiyofasi, orzu-umidlarning namunasidir. Ona tili millatning birligi va birdamligining timsolidir. U millatni yagona xalq sifatida o’z atrofida birlashtiradi va dunyoda borliqni ta’min etadi. Har bir millatning o’z Vatani, oilasi bo’lgani kabi uning jonajon va betakror ona tili ham bo’ladi. Inson uchun uning vatani, ota-onasi, oilasi qanchalik qadrli bo’lsa, uning ona tili ham shu qadar aziz va muqaddas bo’ladi.

Joriy yil “O`zbek tiliga Davlat tili” maqomi berilganiga 31 yil to`lgani munosabati bilan Sirdaryo viloyati Transport boshqarmasida davra suhbati bo`lib o`tdi. Guliston Davlat Universiteti Filologiya fakulteti Tilshunoslik kafedrasi o`qituvchisi Dushaeva Gulbahor so`zga chiqib, tilning bugungi kundagi ahamiyati, o’z ona-tilimizni asrab-avaylashimiz, uning nufuzini oshirishimiz, go’zal va sofligini avlodlarga meros sifatida qoldirishimiz, dunyoga tanitishda o’z hissamizni qo’shishimiz kerakligi haqida aytib o`tdi.

2018 yil Zulfiya nomidagi Davlat mukofoti sovrindori, O`zbekiston Davlat Konservatoriyasi 2 kurs talabasi Mamirova Madina Alisher Navoiyning “Aylagach” g`azalini maqom yo`nalishida kuylab, barcha tadbir ishtirokchilariga estetik zavq ulashdi.

Transport boshqarmasi inspektorlari Shukuraliyev  Xurshid, O`rinboyev Abdurahim va Mirzayev Sanjar o`zlari yod olgan g`azallarni aytib berishdi.

Transport boshqarmasi boshlig`i Erbekov Oybek til millatning buyuk boyligi, bebaho xazinasi, tuganmas mulki ekanligi, millatning tarixi, uning madaniy, ma’naviy merosi, tilni asrab-avaylash har bir insonning burchidir, deb tadbirni yakunlab berdi.

Til – millat ko‘zgusi, deb bejiz aytilmagan. Xalqimizning necha asrlik boy tarixi, ko‘hna va serqirra madaniyati o‘zbek tili ta’sirida shakllangan.

Sirdaryo viloyati Transport boshqarmasi matbuot xizmati