Сирдарё вилоятининг йўловчи ташиш йўналишларида хизмат кўрсатувчи автокорхоналарнинг ҳаракат таркибини янгилаш чоралари кўрилмоқда...

         Жорий йилнинг 8 июл куни Сирдарё вилояти транспорт бошқармасида Транспорт вазирлиги “Йўловчи ва юк авто ташувларини мувофиқлаштириш” бошқармаси бошлиғи А.Исаев, Хитой Халқ Республикасининг илғор автобуслар ишлаб чиқарувчи корхоналари вакиллари ва янги автобуслар харид қилиш истагида бўлган вилоят ташувчи корхона рахбарлари билан биргаликда учрашув ташкил этилди. Мазкур учрашувда ишлаб чиқарувчилар томонидан йиғилганларга бугунги кунда ишлаб чиқарилаётган автобусларнинг имкониятлари, техник хусусиятлари тўғрисида тўлиқ маълумотлар берилиб фикр алмашилди.

         Вилоят ташувчи корхоналари томонидан жами 20 дона замонавий автобусларни харид қилиш истаги билдирилиб, ишлаб чиқарувчига автобуслар бўйича ўз талаб ва таклифларини беришди. Ишлаб чиқарувчи вакиллар томонидан ташувчи корхона раҳбарларининг талаб ва таклифлари ўрганиб чиқилиб, жорий йилнинг 12 июль кунига қадар автобуслар бўйича шартномалар тақдим этилишига келишилди.

         Олиб келиниши режалаштирилган 20 дона янги автобуслардан 6 таси Гулистон шаҳар ичи йўналишларига 12 таси шаҳар атрофи йўналишларига ва 2 таси вилоятлараро-шаҳарлараро йўналишларга жойлаштирилиши, ушбу йўналишлардан бўшайдиган Isuzu русумли автобусларни вилоятнинг жамоат транспорти етиб бормаган аҳоли пунктларига жойлаштириш белгиланган.   

             Сирдарё вилояти транспорт бошқармаси матбуот хизмати