Сирдарё вилоятида аҳолига йўловчи ташиш хизматларини кўрсатувчи ташувчи корхоналар раҳбарлари диққатига!!!

Ўзбекистон Республикаси Транспорт вазирлиги Сирдарё вилояти транспорт бошқармаси Сизга шуни маълум қиладики, вилоят ИИБ ЙҲХБ бошлиғининг 2021 йил 26 майдаги 10/3-1338 сонли хати бошқармага келиб тушди. Ушбу хатда сўнги вақтларда сиқилган табиий газ ускуналари ўрнатилган автотранспорт воситаларидан фойдаланишда айрим муаммолар мавжудлиги бахтсиз ходисаларни келтириб чиқаришига сабаб бўлаётганлиги, автомобилларга ўрнатилган газ баллонларни белгиланган тартибда техник синовдан ўтказилмаётганлиги, жисмонан ва маънан эскирган газ баллонлардан фойдаланиб келинаётганлиги ҳамда автомобилларни газ билан тўлдириш компрессор шахобчалари томонидан меъёрдан ортиқ газ тўлдирилиши натижасида инсонларнинг ҳаёти ва саломатлигига зарар етказадиган, кўпинча ўлим билан тугайдиган бахтсиз ходисаларни келтириб чиқараётганлиги хусусан, 2021 йил 13 апрел куни Жиззах вилояти, Жиззах шаҳри, Мустақиллик кўчасида ҳаракатланиб кетаётган, Жиззах вилояти экология ва атроф мухитни муҳофаза қилиш бошқармаси ҳузуридаги “Тоза ҳудуд” давлат унитар корхонасига тегишли “Isuzu NPR 82 KLVAY” русумли, 25 145 GAA давлат рақам белгили махсус ахлат ташувчи автомобилига ўрнатилган сиқилган табиий газ баллонида портлаш содир бўлган. Натижада, пиёдалар ўтиш жойида турган 2 нафар фуқаро оғир тан жарохати олганлиги шунингдек, 22 апрел куни Қашқадарё вилояти, Қарши тумани, Истиқлол МФЙ, Шилви қишлоғида жойлашган, “National Food Market” МЧЖга қарашли автомобилларга газ тўлдириш компрессор шаҳобчасида “Nasaf Al Zebona Trans” МЧЖга тегишли “Nexia” русумли 70 558 TTF давлат рақам белгили автотранспорт воситаси сиқилган табиий газ билан тўлдириб бўлгандан сўнг газ баллонда портлаш содир бўлганлиги натижасида 1 нафар фуқаро вафот этган ва 1 нафар фуқаро оғир тан жароҳати олганлиги келтириб ўтилган. Бундан ташқари юқоридаги транспорт воситалари ўрганилганда, тегишли мутасадди корхоналар томонидан транспорт воситаларини йўналишга чиқишдан олдин белгиланган тартибда техник кўрикдан ўтказиш ва уларни белгиланган сақлаш жойларида сақланмасдан фойдаланиб келинганлиги маълум бўлди.    

Юқоридагиларни инобатга олган ҳолда Сиздан жамиятингизга қарашли транспорт воситаларини йўналишга ишга чиқаришдан олдин Ўзбекистон Республикаси Адлия вазирлигидан 2014 йил 14 февралда 2560-сон билан рўйхатдан ўтган йўриқномага асосан ҳайдовчиларни кундалик тиббий кўрикдан, транспорт воситаларини техник кўрикдан сифатли ўтказишингизни, транспорт воситаларига ўрнатилган табиий газ баллонларни белгиланган муддатлардан кечиктирмасдан синовдан ўтказишингизни ҳамда корхонангиз масъуллари ва ҳайдовчиларига юқоридаги ҳолатлар каби ходисалар содир этилмаслиги юзасидан навбатдан ташқари йўриқномалар ўтказишингиз талаб қиланади.