Сирдарё вилоятида 4 та замонавий логистика марказлари фаолияти йўлга қўйилмоқда

Ўзбекистон Республикаси Транспорт вазири ўринбосари Р. Усмонов раислигида 2021 йил 19 март куни ўтказилган 25-сонли йиғилиш баёни 1-бандида Сирдарё вилоятида 4 та замонавий логистика марказлари фаолиятини йўлга қўйиш топшириғи берилган эди ва ҳақиқатда 4 та логистика марказлари фаолиятини йўлга қўйиш юзасидан бирламчи ишлар амалга оширилди:

1.Мирзаобод тумани ҳудудидан ўтувчи “Тошкент-Душанбе” М-34 автомобил йўли бўйидан “Холбой ҳожи маскани” МЧЖ томонидан 14 га ер майдонида “Автомобилларга ёқилғи қуйиш ва техник хизмат кўрсатиш” мажмуаси қурилиши ишлари бошланган бўлиб, бугунги кунга қадар 28 млрд. сўмлик қурилиш монтаж ишлари амалга оширилган.

Вилоятда  транспорт инфратузилмасини  янада такомиллаштириш, экспорт-импорт  салоҳиятини ошириш ҳамда халқаро ва миллий юк ташувчиларга қўшимча шарт-шароитлар яратиш мақсадида, жамият таъсисчилари билан суҳбатлашилди ва мазкур мажмуада транспорт-логистика хизматларини йўлга қўйиш ҳамда шу мақсадлар учун қўшимча бино ва иншоатлар қуриш тўғрисида келишиб олинди.

Замонавий транспорт-логистика маркази қурилиши учун тадбиркор томонидан 20 млр. сўм имтиёзли банк кредити маблағларига эҳтиёж борлиги, бунинг учун гаров таъминоти мавжудлиги маълум қилиниб, кредит маблағлари ажратилишида амалий ёрдам берилиши сўралмоқда.

2. “Сирдарё импекс голд” МЧЖ томонидан Сирдарё тумани Бахт шахри “Темир йўл вокзали” ҳудудига яқин жойдан 1,12 га ер майдони танлаб олиниб, бугунги кунда расмийлаштириш ишлари якунланмоқда. Ушбу ҳудуддан автомобиль ва темир йўл транспортида маҳсулотларни экспорт-импорт қилишда тадбиркорларга кўмаклашиш учун шарт-шароитлар яратиш мақсадида фойдаланиш кўзда тутилган.

3. ”Малика Бунед” МЧЖ томонидан Сирдарё тумани “Малик” СИУ “Наврўз” МФЙ ҳудудида 1,2 га ер майдонида логистика маркази қурилиши якунланмоқда. 1,2 км    темир йўл шаҳобчасини асосий темир йўл тармоғига уланишга тегишли рухсат олишда амалий ёрдам сўралмоқда.

4.Сирдарё туманидаги ”Сирдарё инвест сабзавод” МЧЖ томонидан 0,6 га ер майдонида қишлоқ хўжалик маҳсулотлари экспорти учун мўлжалланган логистика маркази қурилиши учун 1,2 млрд. сўм инвестиция маблағлари киритилган, ҳозирда қурилиш ишлари давом эттирилмоқда. Кенг тармоқли логистика марказига айлантириш учун қўшимча 1,5 га ер майдони ҳамда 3 млрд. сўмлик имтиёзли банк кредитига эҳтиёж мавжуд.

Ҳозирда транспорт-логистика марказлари фаолиятини йўлга қўйиш юзасидан туман ва шаҳар ҳокимликлари билан ҳамкорликда ишлар олиб борилмоқда.

Сирдарё вилояти транспорт бошқармаси матбуот хизмати