МУРОЖААТГА ЖАВОБ!

“Ишонч” газетасининг 53 сонида “Вокзал лойиҳаси қачон амалга ошади?” номли сарлвҳаси остида чиққан мурожаатга Сирдарё вилояти транспорт бошқармаси расмий муносабат билдиради.

  Ўзбекистон Республикаси Президентининг 2015 йил 28 апрелдаги “Иқтисодиётда хусусий мулкнинг улуши ва аҳамиятини ошириш чора-тадбирлари тўғрисида”ги ПҚ-2340-сонли қарорининг 2-иловасига мувофиқ “Гулистон автошохбекати” МЧЖнинг низом жамғармасидаги 94,4 фоиз давлат улуши оммавий савдолар орқали сотилиши белгиланган.

  Шунга кўра, “Давлат активларини тўғридан-тўғри музокаралар ўтказиш (оммавий оферта) савдоси ўтказиш бўйича комиссияси”нинг 12.10.2016 йилдаги йиғилиш баёнига асосан “Sirdaryo Avto Shoxbekat Trans” масъулияти чекланган жамияти оферта савдоси ғолиби деб топилиб, “Хусусийлаштириш, монополиядан чиқариш ва рақобатни ривожлантириш Сирдарё вилоят худудий бошқармаси” ва “Sirdaryo Avto Shoxbekat Trans” масъулияти чекланган жамияти ўртасида ҳамда “Гулистонавтошохбекати” МЧЖ ўртасида 94,4 фоиз давлат улушини сотиб олиш ва қўшимча инвестиция киритиш юзасидан 2016 йил 28 октябрда 248/2016-сонли олди-сотди шартномаси имзоланган.

  Мазкур шартномага асосан “Sirdaryo Avto Shoxbekat Trans” масъулияти чекланган жамияти томонидан “Улуш” учун 855 736 100 (саккиз юз эллик беш миллион етти юз ўттиз олти минг юз ) сўм миқдордаги сотиб олиш тўловларини тўлаш, шунингдек, 2 йил муддатда 400 000 000 сўм инвестиция киритиш, “Гулистон автошохбекати”ни замонавий кўринишда таъмирлаган ҳолда фаолият турини сақлаши ҳамда ҳудудида 50 ўринли кафе бар, 350 ўринли тўйхона ва 100 ўринли умумий овқатланиш чойхонасини ташкил этиши натижасида 4 та янги иш ўринлари яратилиши белгиланган.

  Хусусийлаштириш, монополиядан чиқариш ва рақобатни ривожлантириш Сирдарё вилоят худудий бошқармаси 2016 йил 28 октябрда тузилган 248/2016-сонли олди-сотди шартномасини шартнома шартларининг ўз вақтида бажарилмаганлиги сабабли бир томонлама бекор қилиш юзасидан судга мурожаат қилиб, 2018 йил 6 сентябрда суд қарори билан олди-сотди шартномаси бекор қилинган.

2019 йилнинг бошларида Ўзбекистон Республикаси автомобиль транспорти агентлиги ва “Техсис лойиҳа” МЧЖ томонидан автостанцияни реконструкция қилиш юзасидан лойиҳа ишлаб чиқилган эди.

  Харидор “Sirdaryo Avto Shoxbekat Trans” масъулияти чекланган жамияти томонидан ўзаро тузилган шартномани ўз кучида қолдириш тўғрисида вилоят иқтисодий судига кассация шикояти киритилган бўлиб, тўлов муддатларини узайтириб бериш сўралган.

  2019 йил 1 апрел ҳолатига харидор томонидан тўланиши лозим бўлган тўловлар тўлиқ тўланиб, шартнома шартлари бажарилган.

  Шундан сўнг, Ўзбекистон Республикаси автомобиль транспорти агентлиги ва “Техсис лойиҳа” МЧЖ томонидан автостанцияни реконструкция қилиш юзасидан лойиҳа асосида бошланган реконструкция ишлари тўҳтатилган.

  Бугунги кунга қадар, Сирдарё вилоят транспорт бошқармаси томонидан автостанцияни реконструкция қилиш юзасидан харидорга бир неча бор мурожаатлар қилиниб, кўрсатмалар берилган.

  Автостанция биносидаги эски паспорти автостанция мутасаддиларининг эътиборсизлиги сабабли қолиб кетган, яъни олиб ташланмаган.

Сирдарё вилоят транспорт бошқармаси матбуот хизмати