Barcha yo'lovchi tashish faoliyati bilan shug'ullanuvchi avtokorxona rahbarlari diqqatiga!!!

Respublika maxsus komissiyasining O‘zbekistonda koronavirus infeksiyasi bilan bog‘liq epidemiologik vaziyat barqarorligini ta’minlashda ko‘rilayotgan choralarni muvofiqlashtirish masalalari bo‘yicha kengaytirilgan yig‘ilishi bo‘lib o‘tdi.

Unda O‘zbekistondagi epidemiologik holat hududlar kesimida tahlil qilindi. Kasallikning keng tarqalishini oldini olish maqsadida fuqarolarni karantin qoidalariga rioya qilish borasidagi mas’uliyatini oshirish bo‘yicha vazifalar belgilandi.
O‘zbekiston qonunchiligida “Aholining sanitariya-epidemiologik osoyishtaligi to‘g‘risida”gi qonunga muvofiq, O‘zbekiston Bosh davlat sanitariya vrachi atrofdagilar uchun xavf tug‘diruvchi yuqumli va parazitar kasalliklar paydo bo‘lishi hamda tarqalishi xavfi bo‘lgan taqdirda tegishli sanitariya-gigiyena va epidemiyaga qarshi tadbirlar o‘tkazish to‘g‘risida qarorlar chiqarish vakolatiga egaligi ko‘zda tutilgan.

Ushbu qonunning 30-moddasida sanitariya-gigiyena tadbirlari va epidemiyaga qarshi tadbirlar majmuiga profilaktik emlashlar o‘tkazish ham kiritilgan.
Yuqoridagilarni inobatga olib, O‘zbekiston Bosh davlat sanitariya vrachi, Sanitariya-epidemiologik osoyishtalik va jamoat salomatligi xizmati boshlig‘i Bahodir Yusupaliyevning “O‘zbekiston Respublikasi aholisi o‘rtasida koronavirus infeksiyasining tarqalib ketishini oldini olish bo‘yicha chora-tadbirlarni yana-da kuchaytirish to‘g‘risida” qarori qabul qilindi.
Shuningdek, O‘zbekiston Bosh davlat sanitariya vrachi tomonidan 2015-yil 15-martda tasdiqlangan 0239-07-sonli “Yuqumli kasalliklar immunoprofilaktikasi” sanitariya qoidalari va normalaridagi epidemiologik ko‘rsatma asosida emlash jadvaliga koronavirus infeksiyasiga qarshi emlash tartibi yuzasidan qo‘shimcha kiritildi.
Unga asosan:

2021-yil 1-sentabrgacha 18 yoshdan katta bo‘lgan quyidagi toifa yoki guruhdagi aholi qatlami koronavirus infeksiyasiga qarshi 1-doza vaksinalari;

1-oktabrgacha 2-doza vaksinalari;

1-noyabrgacha 3-doza vaksinalari bilan ommaviy emlanishi (salomatligi bo‘yicha qarshi ko‘rsatma bo‘lgan hollar bundan mustasno) shartligi belgilandi.

Shu sababdan, sizdan korxonangizda ishlovchi barcha haydovchilarni majburiy vaksina olishlarini ta’minlashingiz so’raladi.

Sirdaryo viloyati transport boshqarmasi matbuot xizmati