2025-yil 17-fevral kuni “Yangi Sirdaryo” gazetasining 6-sonida chop etilgan “Avtobuslarning yangicha qatnovi yo‘lovchilar uchun qulaymi yoki?..” sarlavhali maqolasi yuzasidan RASMIY MUNOSABAT

Sirdaryo viloyatida bugungi kunda jami 123 ta yo‘nalishlar mavjud bo‘lib, shundan 85 ta avtobus, 38 ta yo‘nalishli taksi yo‘nalishlari.

Ushbu yo‘nalishlar joylashuvi bo‘yicha 17 ta shahar ichi, 85 ta shahar atrofi, 3 ta viloyat hududidagi shaharlararo hamda 18 ta viloyatlararo-shaharlararo yo‘nalishlaridir.

Viloyat hududida jami 36 ta mahalliy yo‘lovchi tashuvchi korxonalarga qarashli 205 dona avtobus, 149 dona mikroavtobus, 195 dona “Damas” va o‘zin-o‘zi band qilgan jismoniy shaxslarga tegishli 9 054 dona transport vositalari faoliyat ko‘rsatmoqda.

O‘zbekiston Respublikasi Prezidentining 2023-yil 16-fevraldagi “Jamoat transporti tizimini isloh qilish chora-tadbirlari to‘g‘risida”gi PQ-59-sonli qaroriga asosan Guliston shahar hokimligi hamda Toshkent Davlat Transport universiteti o‘rtasida tuzilgan shartnomaga muvofiq Guliston shahrining transport va yo‘l-transport infratuzilmasini rivojlantirish Bosh rejasini ishlab chiqilib, Xalq deputatlari Sirdaryo viloyati Kengashi tomonidan tasdiqlangan.

Toshkent Davlat Transport universitetining ekspertlar guruhi tomonidan Guliston shahrining transport va yo‘l-transport infratuzilmasini rivojlantirish Bosh rejasini ishlab chiqish davomida xalqaro hamda respublikamiz hududidagi transport va turizm sohasi rivojlangan shaharlar tajribasi ham alohida o‘rganilgan.

O‘rganishlar davomida har bir transport va turizm sohasi rivojlangan shaharlar hududlarida tirbandliklarning oldini olish, transport vositalaridan ekalogiya va atrof-muhitga chiqayotgan zararli gazlar miqdorini kamaytirish, shahar jamoat transporti tizimini optimallashtirish, hududlardagi transport infratuzilmasi holatini yaxshilash, aholiga transport xizmatlari ko‘rsatish sifatini oshirish hamda shahar hududining jamoat  transporti bilan qamrab olish darajasini oshirish maqsadida ikki va undan ortiq hududlarda avtostansiya va avtoturargohlar mavjudligi ma‘lum bo‘ldi.

Yuqoridagilarni inobatga olgan holda Guliston shahriga Yangiyer, Shirin shaharlaridan, Boyovut, Guliston, Sardoba, Oqoltin va Xovos tumanlaridan kirib keluvchi jamoat transporti vositalari Guliston dehqon bozori hududidagi “Humo” savdo majmuasi avtoturargohiga, Mirzaobod, Sayxunobod, Sirdaryo tumanlaridan kirib keluvchi jamoat transporti vositalari “Mustang Avto Diagnostik” MChJga qarashli avtostansiya hududiga hamda Guliston shahar yo‘nalishlarida harakatlanuvchi jamoat transporti vositalari Temir yo‘l vokzali hududidagi avtoturargohga joylashtirilmoqda.

Xulosa o‘rnida, barcha mahalliy aholi va Guliston shahriga tashrif buyuruvchi mehmonlaridan jamoat transporti sohasi hamda transport infratuzilmalarini yanada rivojlantirish bo‘yicha olib borilayotgan yangi islohotlarni to‘g‘ri talqin qilishlarini, shuningdek, boshqa harakat ishtirokchilariga hurmat bilan munosabat bildirishlarini so‘rab qolamiz!

Ma’lumot uchun: Bundan avval Guliston shahar hokimligi tomonidan Guliston shahar eski dehqon bozori hududida qurilish ishlari olib borilishi, shu munosabat bilan eski dehqon bozori hududidagi ayrim ko‘chalarda transport vositalari harakati vaqtincha cheklanishi bo‘yicha qaror qabul qilingan.

O‘zbekiston Respublikasi Transport vazirligi

Sirdaryo viloyati transport boshqarmasi